Ministria e Infrastrukturës dhe Transportit ka njoftuar qytetarët dhe operatorët ekonomikë se, bazuar në parashikimin zyrtar të temperaturave për ditën e nesërme, do të zbatohet kufizim i përkohshëm i qarkullimit për automjetet e transportit të mallrave me masë totale mbi 20 tonë.
Kufizimi do të zbatohet vetëm në autoudhë, ndërsa do të jetë në fuqi nga ora 11:00 deri në 17:30.
Sipas Ministrisë, masa është marrë për shkak se temperatura e parashikuar arrin pragun prej 32°C ose më shumë, në përputhje me kriteret për vendosjen e kufizimit.
Në rrugët nacionale, rajonale dhe lidhëse, qarkullimi i automjeteve të transportit të mallrave do të lejohet pa kufizime.
Nga masa përjashtohen:
- automjetet e organeve të rendit dhe sigurisë publike;
- automjetet e shërbimeve emergjente;
- automjetet e institucioneve shëndetësore.
Ministria e Infrastrukturës dhe Transportit u ka bërë thirrje operatorëve ekonomikë dhe ngasësve që të respektojnë kufizimin dhe të planifikojnë qarkullimin në përputhje me orarin e përcaktuar.
Kufizimi synon të menaxhojë qarkullimin e mjeteve të rënda gjatë orëve me temperatura të larta dhe të kontribuojë në sigurinë e komunikacionit.
