Grupi Parlamentar i Partisë Demokratike të Kosovës (PDK), së bashku me anëtarë të Kryesisë, kryetarë komunash, asamblistë, drejtorë dhe aktivistë nga Ferizaj dhe Hani i Elezit, kanë qëndruar sot para objektit të Qeverisë së Kosovës.
Përmes një deklarate të publikuar në rrjetet sociale, PDK-ja ka përsëritur kërkesën për zhbllokimin e situatës institucionale dhe konstituimin e Kuvendit të Kosovës.
“Mesazhi ynë për deputetin Kurti është i qartë: hiq dorë nga uzurpimi institucional dhe ktheju rendit kushtetues, duke mundësuar konstituimin e Kuvendit të Kosovës”, thuhet në deklaratën e PDK-së.
Partia opozitare ka deklaruar se do të vazhdojë aktivitetet e saj politike në mbrojtje të, siç shprehet, shtetit dhe interesit të qytetarëve.
“PDK nuk do të ndalet në mbrojtje të shtetit. PDK nuk do të zmbrapset në mbrojtje të interesit të qytetarëve”, thuhet më tej në reagim.
Në fund të deklaratës, PDK-ja ka mbyllur mesazhin me sloganin: “Deri në fitoren e Republikës!”
