Me fillimin e sezonit veror dhe ardhjen e diasporës në vendlindje, autoritetet në Maqedoninë Veriore kanë shtuar kontrollet në trafik dhe po zbatojnë masa shumë më të ashpra ndaj shkelësve të rregullave rrugore.
Rastet e fundit tregojnë qartë se tejkalimi i shpejtësisë nuk ndëshkohet më vetëm me gjobë, por në raste të rënda mund të çojë edhe në sekuestrimin e automjetit dhe ndalim nga policia.
Sipas rregullave të reja që kanë hyrë në fuqi nga 1 shkurti 2026, policia ka të drejtë të konfiskojë përkohësisht ose edhe përgjithmonë automjetin në rastet kur shoferi:
- drejton mjetin pa patentë shoferi;
- kapet me shpejtësi ekstreme;
- rrezikon seriozisht sigurinë publike në trafik.
Ligji parasheh sekuestrim sidomos kur shpejtësia tejkalohet me:
- 70 km/h mbi limitin në zonë të banuar;
- 90 km/h mbi limitin jashtë zonës së banuar.
Vetëm gjatë 24 orëve të fundit, policia në Maqedoninë Veriore ka arrestuar 13 shoferë për shkelje serioze të trafikut, ku shumica janë kapur duke drejtuar automjete pa leje vozitjeje, ndërsa raste të tjera kanë përfshirë alkoolin dhe shpejtësinë e lartë.
Kontrollet janë intensifikuar veçanërisht në qytete si Shkup, Kumanov dhe Tetov, ku funksionojnë edhe kamera inteligjente në kuadër të projektit Safe City, që monitorojnë automatikisht shkeljet.
Apel për diasporën dhe të gjithë shoferët shqiptarë
Për mërgimtarët që udhëtojnë drejt Kosovës, Shqipërisë apo Maqedonisë së Veriut për pushime verore, mesazhi është i qartë: vozitni me kujdes dhe respektoni kufizimet e shpejtësisë.
Rrugët mund të duken të lira, por kontrollet policore janë më të shpeshta se më parë dhe toleranca është minimale. Një moment pakujdesie mund të përfundojë jo vetëm me gjobë të lartë, por edhe me humbjen e veturës
