Kryeministri në detyrë i Kosovës, Albin Kurti, ka pritur të martën në Prishtinë senatoren amerikane Joni Ernst, një prej zërave të njohur në Kongresin e Shteteve të Bashkuara për mbështetjen ndaj Kosovës.
Takimi vjen pas takimit të tyre të mëparshëm në Washington, në shtator të vitit 2025. Kurti e falënderoi senatoren Ernst për mbështetjen e vazhdueshme amerikane dhe për kontributin në forcimin e partneritetit ndërmjet Kosovës dhe SHBA-së.
Sipas njoftimit të Qeverisë, Kurti e informoi senatoren amerikane për zhvillimet në Kosovë, duke veçuar rritjen ekonomike dhe përmirësimin e situatës së sigurisë në vend.
Kurti kërkon prani të përhershme amerikane në Bondsteel
Një prej temave kryesore të takimit ishte prania ushtarake amerikane në Kosovë.
Kurti ritheksoi qëndrimin e tij se Kampi Bondsteel duhet të shndërrohet në një prani të përhershme ushtarake të Shteteve të Bashkuara në Kosovë.
Sipas tij, një prani e tillë do të ishte garantuese për paqen dhe sigurinë në Kosovë dhe në rajon, ndërsa do të mund të shërbente edhe si bazë strategjike për operacionet e NATO-s në Evropën Juglindore.
Në fokus edhe kriza politike në Kosovë
Kurti dhe senatorja Ernst diskutuan gjithashtu për situatën politike në Kosovë dhe procesin e formimit të institucioneve të reja.
Në këtë drejtim, sipas njoftimit, u theksua rëndësia e vazhdimit të diskutimeve ndërmjet partive politike parlamentare për arritjen e një marrëveshjeje që do të mundësonte formimin e institucioneve.
Takimi zhvillohet në një periudhë të tensionuar politike në Kosovë, ku Kuvendi ende nuk është konstituar dhe partitë parlamentare po përballen me dallime rreth vazhdimit të procesit konstituiv.
Prania e senatores Ernst në Prishtinë dhe diskutimet për sigurinë amerikane në Kosovë vijnë në një moment kur çështjet e sigurisë rajonale dhe forcimit të partneritetit Kosovë-SHBA vazhdojnë të jenë në qendër të debatit politik.
