Kryetari i Nismës Socialdemokrate, Fatmir Limaj, ka komentuar zhvillimet e fundit që lidhen me afrimin dhe bashkëpunimin politik me Partia Demokratike e Kosovës, duke theksuar se ky proces po buron nga vetë baza dhe elektorati i të dy subjekteve politike.
Në emisionin “Rubikon”, Limaj deklaroi se ideja e bashkimit është rezultat i kërkesave të vazhdueshme të qytetarëve dhe mbështetësve në terren, duke e cilësuar atë si një zhvillim të natyrshëm dhe të mirëpritur.
“Kur diçka buron nga baza, nga elektorati dhe nga kërkesat e njerëzve, ajo është krejtësisht e natyrshme. Ky është një proces burimor, i ndërtuar me vullnet dhe dashamirësi. Në fund të fundit, të gjitha këto bëhen për elektoratin”, u shpreh Limaj.
Sipas tij, në takimet dhe aktivitetet e zhvilluara nëpër Kosovë është vërejtur një mbështetje e gjerë për këtë afrim politik, ndërsa qytetarët po e shprehin hapur dëshirën për një bashkëpunim më të ngushtë mes dy forcave politike.
Limaj tha se atmosfera në terren tregon se po krijohet një energji e re politike dhe se elektorati i të dy partive po e mirëpret këtë proces.
“Po ndihemi jashtëzakonisht mirë. Në të gjitha takimet dhe kontaktet që kemi pasur, duket qartë se është ndezur një elektorat i përbashkët. Ky ka qenë një lajm i mirëpritur nga mijëra qytetarë dhe votues të devotshëm”, deklaroi ai.
Deklaratat e Limajt vijnë në një periudhë kur bashkëpunimi ndërmjet Nismës Socialdemokrate dhe PDK-së po shihet si një prej zhvillimeve më të rëndësishme në skenën politike kosovare, me synimin për të konsoliduar votën opozitare dhe për të rritur koordinimin politik në të ardhmen.
