Kryeministri i Lituanisë, Mindaugas Sinkevičius, ka deklaruar se vendi ka përgatitur plane evakuimi në rast të një sulmi të mundshëm nga Rusia.
Në një intervistë për BBC, Sinkevičius tha se lituanezët ndihen vazhdimisht të kërcënuar nga Rusia, veçanërisht për shkak të incidenteve me dronë që hyjnë në hapësirën ajrore të vendit.
Ai theksoi se Lituania “nuk do të dorëzohet” dhe se, në rast të një sulmi, do të kundërpërgjigjet.
Sipas kryeministrit lituanez, autoritetet janë duke u përgatitur për “një sërë skenarësh”, përfshirë evakuimin e qytetarëve të moshuar nga qytetet dhe masat për të shmangur bllokimet e trafikut.
“Po mendojmë për një sërë skenarësh, jo të gjithë po diskutohen shumë publikisht. Ne përballemi me kërcënime konkrete, jo çdo ditë, por po i përjetojmë ato dhe është një realitet i vërtetë për ne”, tha Sinkevičius.
Kërkon qasje më të fortë nga Britania
Sinkevičius gjithashtu kërkoi që Britania e Madhe të ketë një qasje më të fortë ndaj çështjeve të mbrojtjes, duke theksuar se Lituania ndodhet shumë më pranë kufirit me Rusinë.
Lituania është anëtare e NATO-s që nga viti 2004 dhe kufizohet me enklavën ruse të Kaliningradit.
Sipas nenit 5 të Traktatit të NATO-s, një sulm i armatosur ndaj një anëtari të aleancës konsiderohet sulm ndaj të gjithë anëtarëve.
Incidentet me dronë në vendet baltike
Incidentet me dronë janë shtuar në vendet baltike që nga pushtimi i plotë i Ukrainës nga Rusia në vitin 2022, duke rritur shqetësimet për sigurinë e hapësirës ajrore të këtyre vendeve.
