Organizata e Kombeve të Bashkuara (OKB) po përballet me një krizë serioze financiare, ndërsa zyrtarët paralajmërojnë se fondet e disponueshme mund të shterojnë brenda muajit gusht.
Nënsekretari i Përgjithshëm i OKB-së për planifikimin e programeve, financat dhe buxhetin, Chandramouli Ramanathan, deklaroi se organizata aktualisht po operon me burime jashtëzakonisht të kufizuara dhe se pa fonde shtesë mbijetesa pas shtatorit mbetet e pasigurt.
“Paratë kanë mbaruar. Po presim donacione që të mund të mbijetojmë edhe pas shtatorit,” është shprehur ai gjatë një konference për media, duke shtuar se ekziston mundësia e madhe që OKB-ja ta mbyllë vitin me bilanc zero dhe me kufizime të forta buxhetore.
Sipas zyrtarëve, një nga arsyet kryesore të mungesës së likuiditetit janë pagesat e vonuara nga dy kontribuuesit më të mëdhenj të organizatës — SHBA dhe Kina — të cilët së bashku mbulojnë rreth 42 për qind të buxhetit total të OKB-së.
United States i detyrohet organizatës rreth 4.3 miliardë dollarë, ku afro 2 miliardë dollarë lidhen me kontributet e rregullta për buxhetin bazë të OKB-së, që përdoret për funksionimin e strukturave kryesore të organizatës.
Ndërkohë, China ka detyrime që kalojnë 1.3 miliardë dollarë, duke përfshirë kontribute për buxhetin e zakonshëm, operacionet paqeruajtëse dhe gjykatat ndërkombëtare.
OKB kishte paralajmëruar për rrezikun e një kolapsi financiar që në muajin maj, duke sinjalizuar se pa pagesat e prapambetura ose donacione shtesë, funksionimi normal i organizatës mund të vihet seriozisht në rrezik.
