Përplasjet mes Shteteve të Bashkuara dhe Iranit janë intensifikuar edhe më tej, pasi të dyja palët kanë shkëmbyer një tjetër valë sulmesh gjatë natës, duke shtuar frikën për një përshkallëzim të mëtejshëm të konfliktit në Lindjen e Mesme dhe në rajonin e Gjirit Persik.
Shtetet e Bashkuara ndërmorën sulme të reja ajrore ndaj objektivave iraniane, të cilat presidenti amerikan Donald Trump i cilësoi si një “kundërpërgjigje” ndaj sulmeve të mëparshme mbi anije tregtare në Ngushticën e Hormuzit, për të cilat Uashingtoni fajëson Teheranin.
Komanda Qendrore e SHBA-së (CENTCOM) bëri të ditur se janë goditur rreth 90 objektiva iraniane. Sipas saj, operacioni kishte për synim dobësimin e kapaciteteve ushtarake të Iranit për të sulmuar anijet tregtare dhe lundrimin civil në Ngushticën e Hormuzit.
Pak orë pas operacionit ushtarak, presidenti Trump deklaroi para gazetarëve në bordin e avionit presidencial Air Force One se zyrtarë iranianë kanë kontaktuar me administratën amerikane dhe se “duan shumë të arrijnë një marrëveshje”. Megjithatë, ai shtoi se mbetet i pasigurt nëse ata janë “të denjë” për një marrëveshje.
Ndërkohë, tensionet janë përhapur edhe në vendet e Gjirit Persik. Bahrejni raportoi shpërthime në kryeqytetin Manama, Kuvajti njoftoi se kishte interceptuar raketa dhe dronë, ndërsa Katari ngriti nivelin e gatishmërisë dhe lëshoi alarm sigurie për situatën në rajon.
Nga ana tjetër, kryetari i Parlamentit iranian dhe negociatori kryesor i Teheranit me SHBA-në, Mohammad Bagher Ghalibaf, reagoi përmes rrjetit social X, duke deklaruar se “Amerika ende nuk e ka kuptuar se bullizmi dhe shkelja e premtimeve nuk janë më pa kosto”.
Përshkallëzimi i fundit vjen vetëm një ditë pasi Shtetet e Bashkuara njoftuan se kishin goditur mbi 80 objektiva ushtarake iraniane, në përgjigje të sulmeve ndaj anijeve tregtare në Ngushticën e Hormuzit, duke e bërë situatën e sigurisë në rajon edhe më të brishtë.
