Një incident i raportuar në Skenderaj ka përfunduar me dy persona të lënduar që kanë kërkuar ndihmë mjekësore emergjente në Spitalin e Përgjithshëm “Dr. Sami Haxhibeqiri” në Mitrovicë.
Zëvendësministri i Financave dhe njëherësh kryetari i Qendrës së Lëvizjes Vetëvendosje në Skenderaj, Hysni Mehani, ka pretenduar se është sulmuar fizikisht nga kryetari i Komunës së Skenderajt, Sami Lushtaku.
Pas raportimeve për incidentin, reagoi edhe Spitali i Përgjithshëm në Mitrovicë, duke konfirmuar se rreth orës 13:10, dy persona nga Skenderaj janë paraqitur për trajtim emergjent.
Sipas njoftimit të spitalit, njëri prej tyre ka pësuar lëndime në fytyrë dhe kokë, ndërsa personi tjetër ka marrë gërvishje dhe lëndime fizike.
“Dy persona nga Skenderaj kanë kërkuar ndihmë mjekësore emergjente. Të dy personat kanë shenja lëndimesh, njëri fizike në fytyrë dhe kokë, kurse tjetri lëndime/gërvishje fizike”, thuhet në njoftimin zyrtar.
Aktualisht, ekipet mjekësore janë duke kryer ekzaminimet e nevojshme, ndërsa ende nuk ka një deklarim zyrtar nga organet e rendit lidhur me rrethanat e plota të incidentit.
Pritet që në orët në vijim të ketë reagime shtesë nga palët e përfshira dhe institucionet kompetente.
