Presidenti rus Vladimir Putin ka përjashtuar mundësinë e një takimi me homologun e tij ukrainas Volodymyr Zelenskyy, duke deklaruar se nuk sheh asnjë arsye për një takim të tillë, ndërsa ka përsëritur se Rusia do të vazhdojë operacionet ushtarake deri në arritjen e objektivave të saj strategjikë.
Duke folur në seancën plenare të St. Petersburg International Economic Forum, Putin iu përgjigj drejtpërdrejt ofertës së Zelenskyt për dialog, duke e cilësuar atë të panevojshme.
“Nuk shoh asnjë arsye për një takim”, tha kreu i Kremlinit, duke shtuar se Ukraina po kërkon negociata vetëm për të ndalur avancimin e forcave ruse në fushëbetejë.
Putin iu referua edhe letrës së fundit publike të Zelenskyt, duke e kritikuar tonin e saj dhe duke e cilësuar si të papërshtatshme publikimin e çështjeve personale në debatet politike.
“Pala ukrainase po përpiqet ta bëjë të pamundur një takim personal. Letra përmban elemente vrazhdësie dhe nuk kontribuon në dialog”, deklaroi ai.
Presidenti rus përsëriti se Moska nuk ka ndërmend të ndryshojë kursin e saj në luftë.
“Operacionet ushtarake do të përfundojnë kur të kemi arritur objektivat që i kemi vendosur vetes”, tha Putin, duke shtuar se Rusia po avancon “ngadalë, por me vendosmëri” në rajonin e Donbasit.
Në një mesazh drejtuar ushtarëve rusë në vijën e frontit, ai deklaroi:
“I gjithë vendi është krenar për ju dhe i ka varur tek ju shpresat e veta. Punoni, vëllezër.”
Gjatë fjalimit, Putin kritikoi gjithashtu idenë e përfshirjes më të madhe të Europës në negociatat për Ukrainën, duke vënë në pikëpyetje rolin që Kievi i atribuon vendeve europiane.
Sipas tij, elitat europiane po kontribuojnë në rritjen e tensioneve ndërkombëtare.
“Elitat europiane po krijojnë kaos dhe po përpiqen të tërheqin gjithnjë e më shumë vende në këtë situatë”, u shpreh presidenti rus.
Putin shprehu gjithashtu vlerësim për presidentin amerikan Donald Trump, duke iu referuar përplasjes së njohur mes Trumpit dhe Zelenskyt gjatë një takimi në Shtëpinë e Bardhë.
“Të gjithë pamë se si Donaldi u përpoq ta edukonte autorin e letrës dhe t’i mësonte atij rregullat e sjelljes. Faleminderit, Donald, por ka ende shumë punë për të bërë”, tha ai me ironi.
Presidenti rus akuzoi gjithashtu Perëndimin se po përdor sanksionet si mjet për të dëmtuar ekonominë globale dhe për të kufizuar konkurrencën ndërkombëtare, ndërsa ritheksoi se Rusia do të vazhdojë të mbrojë interesat e saj strategjike.
Deklaratat e Putinit vijnë në një kohë kur përpjekjet diplomatike për t’i dhënë fund luftës në Ukrainë mbeten të bllokuara dhe perspektiva e një takimi të drejtpërdrejtë mes liderëve të dy vendeve duket më e largët se kurrë.
