Presidenti i Shteteve të Bashkuara, Donald Trump, ka njoftuar se ka vendosur të anulojë sulmet e planifikuara ushtarake ndaj Iranit, me kusht që të arrihet shpejt një marrëveshje me Teheranin.
Deklarata e tij vjen vetëm disa orë pasi mediat amerikane raportuan se Uashingtoni po shqyrtonte mundësinë e ndërmarrjes së sulmeve të reja ajrore ndaj objektivave iraniane.
Në një postim në platformën Truth Social, Trump tha se vendimin e ka marrë “për të mirën e ardhshme të botës” dhe për t’i dhënë mundësi një zgjidhjeje diplomatike.
“Pranova, për të mirën e ardhshme të botës dhe, njëkohësisht, për mbijetesën e një Irani të suksesshëm dhe të begatë, të anuloj sulmin, me kusht që të mund të arrijmë shpejt një marrëveshje”, shkroi Trump.
Paralajmëron me forcën ushtarake amerikane
Megjithëse njoftoi pezullimin e operacionit, presidenti amerikan theksoi se SHBA-ja mbetet plotësisht e gatshme për veprim ushtarak nëse diplomacia dështon.
Sipas tij, Shtetet e Bashkuara disponojnë kapacitete ushtarake të jashtëzakonshme.
“SHBA-të janë plotësisht të përgatitura dhe të gatshme për të vepruar kundër Republikës Islamike të Iranit, me nivele fuqie ushtarake, force dhe kapaciteti zjarri që nuk janë parë që nga Lufta e Dytë Botërore”, deklaroi ai.
Trump: Irani kërkoi shtyrjen e sulmit
Trump pretendoi se Uashingtoni kishte marrë kërkesa nga Irani dhe vende të tjera të Lindjes së Mesme për të shtyrë çdo veprim ushtarak, pasi, sipas tij, tashmë janë përcaktuar parametrat bazë të një marrëveshjeje.
Ai tha se marrëveshja do të përfshinte hapjen e plotë të Ngushticës së Hormuzit dhe eliminimin e kërcënimit bërthamor iranian.
“Bazuar në këtë kërkesë, pranova të anuloj sulmin, me kusht që të mund të arrijmë shpejt një marrëveshje”, theksoi presidenti amerikan.
Mbështetje nga Izraeli
Trump shtoi se edhe Izraeli mbështet këtë angazhim diplomatik dhe u bëri thirrje të gjitha palëve të përfshira që të intensifikojnë përpjekjet për finalizimin e marrëveshjes.
“Jepni maksimumin dhe përfundoni marrëveshjen. Ju falënderoj për vëmendjen ndaj kësaj çështjeje!”, përfundoi ai.
