Një stuhi politike ka shpërthyer në Itali pas deklaratave të presidentit amerikan Donald Trump ndaj kryeministres italiane Giorgia Meloni, pas samitit të G7 në Evian.
Gjatë një interviste për median italiane, Trump u shpreh me tone përçmuese ndaj Melonit, duke pretenduar se ajo i ishte lutur për një fotografi.
“M’u lut të bëja një foto me të. E donte aq shumë atë foto me mua. Mund edhe të mos e kisha bërë, por më erdhi keq për të,” deklaroi Trump.
Komentet e tij shkaktuan reagim të menjëhershëm nga Roma. Meloni i hodhi poshtë kategorikisht pretendimet, duke i cilësuar si trillime.
“Jam e habitur nga këto deklarata. Nuk e kuptoj pse presidenti amerikan sillet kështu me aleatët e tij. Një gjë duhet ta dijë: unë dhe Italia nuk përgjërohemi kurrë,” deklaroi ajo.
Kryeministrja italiane shtoi se i vjen keq që Trump nuk tregon të njëjtën ashpërsi ndaj kundërshtarëve të Perëndimit, duke lënë të kuptohet se sjellja e tij ndaj aleatëve është e pajustifikueshme.
Përplasja ka prodhuar pasoja të menjëhershme diplomatike. Ministri i Jashtëm italian Antonio Tajani anuloi vizitën e planifikuar në Miami, duke i quajtur komentet e Trump “të rënda dhe fyese për gjithë Italinë.”
Reagime të forta erdhën edhe nga spektri politik italian. Kreu i partisë Lega, Matteo Salvini, mbrojti Melonin, ndërsa ish-kryeministri Giuseppe Conte deklaroi se Italia nuk meriton të poshtërohet publikisht nga një aleat.
Edhe figura të opozitës e kritikuan Trumpin, duke i cilësuar komentet e tij si të papranueshme dhe denigruese ndaj institucioneve italiane.
Pavarësisht buzëqeshjeve dhe takimeve gjatë samitit të G7, raporti mes Trump dhe Meloni duket më i tensionuar se kurrë. Ajo që duhej të ishte një fotografi protokollare, tashmë është kthyer në një krizë të vogël diplomatike mes Romës dhe Uashingtonit.