Donald Trump ka mbyllur natën e parë të konventës së mesmandatit të republikanëve me një fjalim prej rreth një orë e 45 minutash, gjatë të cilit u kërkoi amerikanëve të votojnë për kandidatët republikanë dhe bëri një premtim të bujshëm: 5 mijë dollarë për çdo të rritur amerikan nëse partia e tij fiton zgjedhjet e nëntorit.
Presidenti amerikan Donald Trump u kërkoi votuesve që në zgjedhjet e mesmandatit të votojnë sikur emri i tij të ishte në fletën e votimit, duke e paraqitur kontrollin republikan të Kongresit si vendimtar për ekonominë dhe politikat e administratës së tij.
Gjatë fjalimit, Trump premtoi gjithashtu një pagesë prej 5 mijë dollarësh për çdo të rritur amerikan, në rast se republikanët fitojnë kontrollin e Dhomës së Përfaqësuesve dhe/ose Senatit.
Trump sulmoi ashpër demokratët, duke i cilësuar vazhdimisht si “komunistë” dhe duke paralajmëruar se, sipas tij, fitorja e tyre do të sillte pasoja negative për vendin.
“Nëse humbasim, ju do të humbni kufirin, uljen e taksave, sigurinë…”, deklaroi ai.
Trump premton ulje taksash dhe reforma në shëndetësi
Në fjalimin e tij, Trump premtoi gjithashtu që uljet e taksave të bëhen të përhershme, si dhe ndryshime në sistemin e sigurimeve shëndetësore.
Ai tha se siguruesit shëndetësorë duhet të detyrohen të bëjnë publike çmimet paraprakisht, në mënyrë që amerikanët të mos përballen me fatura të papritura.
Presidenti amerikan e lidhi një pjesë të debatit për koston e jetesës edhe me luftën në Iran, duke mbrojtur vendimin e tij për përballjen me Teheranin, pavarësisht ndikimit që konflikti ka pasur në çmimet e karburanteve dhe ushqimeve.
“A mund të ketë Irani një armë bërthamore? Ata thonë, ‘Absolutisht jo’. Por atëherë kam të drejtë!”, tha Trump.
Premton fushatë në 35 shtete dhe distrikte
Trump ka paralajmëruar se gjatë dy muajve të ardhshëm do të zhvillojë fushatë në 35 shtete dhe distrikte të lëkundura, ku do të mbështesë kandidatët republikanë.
Ai ka thënë se synon të vizitojë disa prej tyre edhe dy ose tri herë, ndërsa është ankuar se arritjet e administratës së tij, veçanërisht në emigracion dhe ekonomi, nuk po marrin vëmendjen mediatike që ai kërkon.
Fjalimi i presidentit ishte i mbushur edhe me shaka dhe improvizime. Trump u ndal disa herë nga tema në temë, duke u larguar nga teksti i teleprompterit dhe duke u rikthyer më pas te pikat kryesore.
Ai bëri shaka edhe me disa prej kandidatëve republikanë dhe hodhi ide ironike për ndryshimin e emrave të disa vendeve dhe territoreve.
Surprizë: Demokrati Fetterman prezanton republikanin McCormick
Një nga momentet e papritura të mbrëmjes ishte paraqitja e senatorit demokrat nga Pensilvania, John Fetterman.
Ai doli në skenë për të prezantuar kolegun e tij republikan nga i njëjti shtet, David McCormick, duke argumentuar se ekziston mundësia që demokratët dhe republikanët të punojnë së bashku në çështje të caktuara.
Arena nuk ishte plot
Pavarësisht pretendimeve të Trump se stadiumi ishte i mbushur plot dhe se kishte radhë jashtë, në sallë u vunë re disa vende bosh.
Presidenti u kërkoi mbështetësve të tij të mos u kushtonin rëndësi raportimeve të mediave për pjesëmarrjen në event.
Republikanët përballen me shqetësimin për inflacionin
Folësit republikanë në konventë janë përpjekur t’u përgjigjen shqetësimeve të amerikanëve për inflacionin dhe koston e jetesës.
Ata kanë theksuar uljet e taksave dhe performancën pozitive të tregjeve si shenja të përmirësimit ekonomik, ndërsa kanë paralajmëruar se ekonomia mund të përkeqësohet nëse demokratët marrin kontrollin e Dhomës së Përfaqësuesve ose Senatit.
Trump pritet të mbajë një tjetër fjalim në ditën e dytë të konventës, ndërsa në program janë edhe zëvendëspresidenti J.D. Vance dhe Sekretari i Shëndetësisë dhe Shërbimeve Njerëzore, Robert Kennedy.
Fjalimi përmbyllës i Trump këtë herë pritet të jetë më i shkurtër.
Premtimi prej 5 mijë dollarësh për çdo të rritur amerikan është një nga deklaratat më të bujshme të fushatës së Trump për zgjedhjet e mesmandatit, ndërsa detajet se si do të financohej dhe zbatohej një pagesë e tillë nuk janë bërë të qarta në këtë deklaratë.
