Presidenti i Shteteve të Bashkuara, Donald Trump, ka deklaruar se SHBA-të do të marrin një rol të drejtpërdrejtë në mbikëqyrjen e Ngushticës së Hormuzit, një nga korridoret më të rëndësishme të transportit të naftës në botë, duke paralajmëruar edhe vendosjen e një tarife prej 20 për qind për mallrat që kalojnë nëpër këtë zonë.
Trump tha se Shtetet e Bashkuara do të bëhen “roje” të ngushticës, duke argumentuar se Uashingtoni ka mbajtur barrën e sigurisë së kësaj rruge strategjike për dekada pa kompensim financiar.
“Ne do të bëhemi roje të ngushticës. Do ta godasim Iranin shumë fort dhe do ta mbajmë ngushticën, ndoshta edhe do ta drejtojmë atë”, deklaroi Trump gjatë një interviste për “Fox & Friends”.
Më pas, përmes një postimi në platformën Truth Social, presidenti amerikan tha se SHBA-të do të kërkojnë kompensim financiar për operacionet e sigurisë në këtë zonë.
“Si çështje drejtësie, Shtetet e Bashkuara do të rimbursohen me një normë prej 20% për të gjitha ngarkesat e transportuara, për kostot e nevojshme për sigurimin dhe mbrojtjen e kësaj pjese shumë të paqëndrueshme të botës”, shkroi Trump.
Sipas tij, të gjitha vendet do të vazhdojnë të kenë qasje në përdorimin e lirë të Ngushticës së Hormuzit, por SHBA-të do të marrin përsipër rolin kryesor të sigurisë.
Deklaratat vijnë pas përshkallëzimit të tensioneve ushtarake mes Uashingtonit dhe Teheranit, ku gjatë fundjavës pati shkëmbime sulmesh në Gjirin Persik. Komanda Qendrore e SHBA-së (CENTCOM) njoftoi se kishte kryer sulme ndaj objektivave ushtarake iraniane, me qëllim, sipas saj, dobësimin e aftësisë së Iranit për të kërcënuar anijet tregtare që kalojnë nëpër këtë rrugë detare.
Ndërkohë, autoritetet iraniane kanë kundërshtuar çdo përpjekje amerikane për të kontrolluar ngushticën. Një zëdhënës ushtarak iranian deklaroi se Teherani “nuk do të lejojë në asnjë rrethanë” ndërhyrjen e SHBA-së në menaxhimin e Ngushticës së Hormuzit.
Ngushtica e Hormuzit është një nga pikat më të rëndësishme strategjike në tregtinë globale të energjisë, pasi një pjesë e konsiderueshme e eksporteve të naftës dhe gazit natyror kalon përmes saj.
Tensionet e fundit kanë ndikuar edhe në tregjet energjetike. Çmimet e naftës bruto amerikane u rritën me mbi 5 për qind, duke arritur rreth 75 dollarë për fuçi, si pasojë e pasigurisë mbi sigurinë e transportit në Gjirin Persik.
